Gall-Italich de Basilicada

Quest articol chì l'è scrivuu in lombard, grafia milanesa.

Con la definizion de Gal-Italich de la Basilicada a ciamom on grupp de isol lenguistich situaa in de la region de la Basilicada, in del sud de l'Italia. Hinn ciamaa inscì perchè gh'hann di caratteristich che ja dividen di alter dialett de la zòna e che regòrden quei de la famiglia di lengov gal-italich, in del nòrd Italia. I dialett se troeuven in dò center principai: el primm l'è quell di paes arent al Golf de Policaster (comun de Trecchina, Rivello, Nemoli e fòrsi anca a Tortorella e Casaletto Spartano); el segond l'è quell situaa arent a la città de Potenza (comun de Picerno, Tito, Pignola, Vaglio Basilicata, l'istessa Potenza, Ruoti, Cancellara, Pietragalla, Avigliano e Trivigno).

L'origin de quei parlad chì la gh'ha de vess reportada al rivà de nucli de popolazion settentrional che in del Medioev hinn andaa dree ai sò feudatari. I studios pensen che sien vegnuu de ona zòna tra Piemont e Liguria, probabilment de la Provincia de Savòna. De fatt quell territòri chì l'è staa dominaa a longh di Marches del Monferraa, che ai temp di Normann eren anca signor del Golf de Policaster. Se pò nanca esclud che l'area di dialett gal-italich lucan la fuss pussee vasta e che col temp vari parlad se sien adattaa al contest dialettal local.

Al dì d'incoeu el gal-italich de Basilicada l'è minga in bònn condizion e 'l ris'cia de sparì, a favor sia di dialett pussee "meridionai" sia de l'Italian, anca se dòpo i studi del lenguista todesch Gerhard Rohlfs l'è nassuu on poo de interess per i sò sòrt.